الشاعر فهمى_على

انا اللى ف كل احلامى
باشوف بكره ماهوش طيب
و لا بيجينى ف معاده
و لا بيصدق و لا يطيب
فلا جابلى ف يوم ضحكة
و لا مرة حضن روحى
و لا طبطب على قلبى
و لا ملس على جروحى
ف باهرب من شروق فجره
و اسيب ليلى يطول حبة
دعيت ياما كتير ينسى
عشان نفسى ماهيش حابة
ما انا اللى حلمت  بوصوله
عشان لازم جايبلى جديد
اتارى الحلم خان بدرى
و بيجيب يوم وجع و يعيد
ما جابش ف مرة يوم هادى
و لا ذكرى تكون حلوة
و لا بايده مسح دمعى
و لا سمعنى يوم غنوة
ما بين الناس بقت صورتى
ملانة شروخ كتير واضحة
و مهما ضحكت مش باعرف
عشان بتكون دموع فاضحة
ف هاقفل باب على بكره
و مش هارجع و انادى عليه
و لو خبط هاقول اسف
كرهتك .. امشى ... انت سفيه
#فهمى_على