لو كنت بقدِر إبتِكِرْ إيدينْ
يعدُّوا معي قدِّيش مشتقلِكْ
لو كَان عندي هيك شي صوتين
يقوموا معي بالليل نندهلِكْ
صوتي مَ بيكفي المكان بعيدْ
وإنتي بقصرك فوق, نسيانةْ
في بِنْ بعيونكْ,
بياض,
نبيد
وفي ناس فيهن هيك سهرانةْ
وفي ضَو جايي بجيبتو هالعيد
وفي ولاد ناطرتك وضجرانةْ
جيتي,
وبقلبي معتَّق القرميد
و عَ شوي صَدِّتْ روح تعبانةْ
طلعتي شمس, عصفور, وزغاريد
وجايي الفرح عَ ضهور الغناني
لو كان فيي شوفك من جديد
طمِّيع فيكي,
الشوق رَبَّاني
لو كان فيي شمِّك بروحي
وضمِّك ع أيامي متل فاض الأمانْ
زهِّر, وطير, وروح وتروحي
نمشي سوا ونهد حيطان الزمانْ
لو كان فيي إغمرِكْ عمرين
تَ موت فيكي وعود إخلَقلِكْ
لو كنت بقدر إبتِكِر إيدينْ
يعدُّوا معي قدِّيش مشتقلِكْ.....
........
.....منيار العيسى🌹
ليست هناك تعليقات:
إرسال تعليق