الشاعرة مليكة الادريسي

وااه الايام...
واش نفكرك..
الى انسيتي...
همك رشاني...
والعمر راح فاني...
الزمان..بحالتي...
ما داري...
اصفق الى بكيك...
والضحكة  مني...
تبكيه...
واه الايام...!!!
مالك معكسة...
الحظ خذيتيه...
ولعزيز ف الحباب...
خطفتيه...
ف قبر بعيد دفنتيه...
شكون اليوم ...
معاك يتغزل...
فدموعي...
شكون لي حالي عاجبو...
ياك..ما نكره ما نحسد...
وانت  ضدي...
تحسبيني غريب...
والباب الزين تسديه...
راك عارفة العمر قصير...
وانت  كيف البرق تجري...
بالله عليك...
لا تدفنيني حدا عدو...
ولا ف ارض ...
خلات الناس كاملين...
وعليا سرجات الحديد...
آه منك يا الايام...!!!
الربيع ما هو ربيع...
لا زهر مقطر...
ولا ورد ريحته تسكر...
الواد لي عاهدته...
يسقي جناني...
نشف وتبخر...
فين داك الطير...
لي من صباحو..
افيق النايم...
بالتغريد...
وااه الايام...!!!
الخاوة...عداوة...
ف زمان صعيب..
البيوت لي كانت..
مفتوحة...
ل عابر سبيل...
بسناسل وقفل تسادات...
الشمعة لي كانت مضوية...
الخيام...
برياح الغذر طفات...
الظلام فعيونا...
واخا الشمس بنورها
ضوات
وااه...الايام...!!!
كان يا مكان...
اليوم ما هو كاين...
و غدوة الله عالم...
كيف اكون.
بقلمي✍ مليكة الادريسي