الشاعر احمد صبري

عود اْخضر
احمد صبري
-
الحلم طاير بطيفك
مبقاش خلاص محبوس
قلمك يشبه لسيفك
خشب وأكله السوس
اْْخرك تعيش الحلم
وتشوفه كأنه فيلم
ترمي بإيدك همومك
وتسيب قلبك يلم
-
عود اْخضر في وش الريح
وتايه في الهوا ربيعه
نصيبه يكون من المجاريح
مع اللي يتوهوا ويضيعوا
وليل اسود بقاله سنين
بيحكم كل شيء باطل
بيظلم كل يوم مساكين
وايه باقي وايه فاضل
-
قتل الجميع عدم الولاد
صنع الوهم والارهاب
كل يوم دم وحداد
الرحمة على كل الشباب
القلب صحصح وفاق
شاف كل شيء بحق
من عتمة الأشواق
القلب بطل دق
-
عود اْخضر يا ناس للبيع
والورد  بيعطر روحه
حقه بيتسرق ويضيع
وكان بيإن من نوحه
كان عايش لكن بيموت
مابين القهر والمجهول
ليل يجي وليل بيفوت
وليل الظلم زي الغول
-
بيقتل فرحنا وشمسنا
ويبني سجون تلمنا
ولما نقول عيب وحرام
يقولوا ان دا ذنبنا
عشان عايشين وما موتناش
عملنا الثورة ومحكمناش
وسرقوها وسرقونا
وباعونا كمان ببلاش