قصيده بعنوان " ألف مبروك "
قالوا لي حد غيري طلب أديكي
وأنتي فرحانه والفرحه باينه فـ عنيكي
وانا بردوا فرحتلك .. والله فرحت ليكي
أوعي تكوني فاكره أني زعلت منك أو عليكي
بالعكس..دا أنا ما لحقتش أعلق نفسي بيكي
أنتي بالنسبالي وهم..عشت فيه يادوب سعات
كنت فاكره أنه حلم .. وقبل مايصحي فيا مات
دا انا لسه ماليش معاكي حتى ذكريات
أفتكرها فـ ليلي وأندم ع اللي فات
هما يادوب كام ليله وكام يوم
كنت شايفك نجم ساطع وسط النجوم
قلت هينور حياتي ويشيل عني الهموم
أتاري طقس حبك مُلبد بالغيوم
ورياح الغدر جايه فوق الإحتمال
وأنا قلبي ياما أتحمل ..كتير وياما شال
وكنت ديما اكمل وأنا عندي صبر جبال
ونفسي انام الليل وأنا مرتاح البال
فارقي وعيشي حياتك وما يهمكيش
ولو كنتي خايفه عليا بقولك .. ماتخافيش
انا بيكي او من غيرك ..هعيش
والحياه من غير حب .. ما بتنتهيش
وألف مبروك .. وربنا يتمم بخير
جمله ياما قلتها لغيرك كتير
وأنتي زيك زيهم .. الفرق بينكم مش كبير
كلكم .. في الغدر عندكم .. حبة ضمير
الشاعر أحمد جوده
ليست هناك تعليقات:
إرسال تعليق