حرير الدرة يزين لكبالة
الفيدة في لحبوب بعد الثمارة
الا طوالت الغوفالة
اقصد رحبة الحجامة
وياك تعطي راسك لمن والى
كبير لحجامة يتعلم في روس ليتامى
حتى الدجاج ينقب الرأس في النخالة
قالوا هذا عير يتيم حسنو ليه بلا ما
ملي سال دمي شكيت همي
قالو لي اسكت فيك لفهامة
بز مني زميت فمي تزاد غمي
قلت ها ندامتي ما نفعتني ندامة
مسحت دمي بجلال كمي
شكيت على بويا المرحوم في منامة
فضفضني بويا من ذراعي وقال
إلا دياق بك في دار الباطل الحال
تعالى لدار الحق راه الدنيا مجذامة
فقت الصباح مربوك قلت حجارك يشدوك
علاش ابويا بعد الميمة ركبت بحر الموت
وخليتيني منتوف الجناح بين العوامة
لمحنة ابويا معاك ماتت ما بقات ليها مزية
قطعت لياس من شي ناس طغاو بلا قياس
ولات النخوة على لخوا
تبدلت لحسانة ما بقات كانة
كلشي تلف شي صلع شي خلى العرف
شي طلق سالف فوق كتف طولو كامة
لحسانة تزين الرأس إلا كان لعقل لا بأس
الرأس بلا عقل مولاه مبهدل
ما يزينو لثام ولا لباس ما تزينو عمامة
شربت وشفت خيالي في غراف الما
قلت ليه اش عندك من قيمة
ساكت ومزنزن بحال لبهيمة
الرجلة والهمة ماشي بطول القامة
قال لي راسي اش بيدي ما ندير
مع من انا شي باغي عير خبز فطير
شي في السما طاير شي شاد بندير
الله يجعل السلامة
كل نهار تبان علامة
نساوا عذاب القيامة
نساوا لخلاص ولغرامة
قلت لراسي اسكت راه لكلام
يرفع من الشأن ويهز من لمقام
واللي قال كلام بلا تخمام
يتهرس ليه فمو برزامة
كون رامي طلق الكلمة بحكمة
شحال من كلمة مغمة
كانت للجماعة ولخيام هدامة
غاب خيالي من الغراف
تخطف عقلي بمخطاف
كبرت الغوفالة لبست دربالة
زعفت ومشيت في حالي
زولت هم الدنيا من بالي
فضلت نعيش بوهالي
سكنت في خلوة مظلامة
الدنيا سابت ما فيها حكامة
داز عام جاني بويا في منامة
فضفضني داني حليت عيني
لقيت خدي على التراب
وكنازتي ملفوفة في كفني
شهدت كنتسنى العدالة يوم القيامة
محمد المؤذن مؤسس ورئيس جمعية كازابلانكا للتراث الشعبي -المغرب 20 غشت 2017
ليست هناك تعليقات:
إرسال تعليق